This site is not complete. The work to converting the volumes of സര്‍വ്വവിജ്ഞാനകോശം is on progress. Please bear with us
Please contact webmastersiep@yahoo.com for any queries regarding this website.
Reading Problems? see Enabling Malayalam
കുളു താഴ്‌വര
സര്‍വ്വവിജ്ഞാനകോശം സംരംഭത്തില്‍ നിന്ന്
കുളു താഴ്‌വര
ഹിമാചല്‍ പ്രദേശിലെ ഒരു താഴ്‌വരപ്രദേശം. ചുറ്റും ഉന്നതങ്ങളായ പര്‍വതങ്ങളാല്‍ ചുറ്റപ്പെട്ട്‌ സമുദ്രനിരപ്പില്‍ നിന്ന് 1,800 മീ. ഉയരത്തില്‍ സ്ഥിതിചെയ്യുന്നു. ഹിമാചല്‍ പ്രദേശ്‌ സംസ്ഥാനത്തെ കുളു, മാണ്ഡി എന്നീ ജില്ലകള്‍ ഈ താഴ്‌വരപ്രദേശത്താണ്‌. സ്ഥിരഹിമപ്രദേശത്തിനു തൊട്ടുതാഴെയാണ്‌ കുളു താഴ്‌വരയുടെ സ്ഥാനം. ഇവിടത്തെ 4,115 മീറ്റര്‍ പൊക്കമുള്ള റോട്ടാങ്‌ ചുരം കുളുവിനെ ലാഹുലില്‍ നിന്ന് വേര്‍തിരിക്കുന്നു. കുളുവും കുംഗ്രാമും ഇരട്ടയായി സ്ഥിതിചെയ്യുന്ന താഴ്‌വരകളാണ്‌. പിര്‍പാന്‍ജാല്‍ നിരകളും സസ്‌കാര്‍ നിരകളും കുളുവിനു മുകളിലായാണ്‌ കാണപ്പെടുന്നത്‌. ഉയര്‍ന്ന പച്ചപുതച്ച മലകളും നിബിഡവനങ്ങളും പൊക്കം കൂടിയ പൈന്‍വൃക്ഷങ്ങളും മഞ്ഞണിഞ്ഞ പര്‍വതനിരകളും എല്ലാംകൂടി കുളു താഴ്‌വരയെ പ്രകൃതിരമണീയമാക്കിത്തീര്‍ക്കുന്നു.
മിശ്രിതസ്‌തൂപികാഗ്രിതവനങ്ങളാണിവിടെ കാണപ്പെടുന്നത്‌. സ്‌പ്രൂസ്‌, സില്‍ വര്‍ സ്‌പ്രൂസ്‌, ഹോഴ്‌സ്‌ ചെസ്റ്റ്‌നട്ട്‌, സില്‍ വര്‍ ഫിര്‍, ബേര്‍ഡ്‌ചെറി, വാല്‍ നട്ട്‌, മാപ്പിള്‍, പോപ്ലാര്‍ മുതലായ മരങ്ങള്‍ ഇവിടത്തെ വനങ്ങളില്‍ സുലഭമായി കാണുന്നു. 915 മില്ലി മീറ്ററോളം വാര്‍ഷികവര്‍ഷപാതം ലഭിക്കുന്ന കുളുവിലൂടെ ഒഴുകുന്ന പ്രധാനനദി ബിയാസ്‌ ആണ്‌. ഹര്‍ലാ, പര്‍ബാതി, സെയിന്‍ജ്‌ മുതലായവയാണ്‌ ബിയാസിന്റെ പ്രധാനപോഷകനദികള്‍. ജനങ്ങള്‍ ഒരുകാലത്ത്‌ ദൈവഭൂമിയായി വിശ്വസിച്ചിരുന്ന ഹിമാചല്‍ പ്രദേശിന്റെ ഏറെക്കുറെ മധ്യഭാഗത്തായിട്ടാണ്‌ കുളു താഴ്‌വര സ്ഥിതി ചെയ്യുന്നത്‌. ഭൂരിഭാഗം പ്രദേശത്തും ഗ്രാനിറ്റിക്‌ പാറകളും ക്രിസ്റ്റലൈന്‍ പാറകളും അടുക്കുകളായി കണ്ടുവരുന്നു. സ്ലേറ്റ്‌, ചുണ്ണാമ്പുകല്ല്‌, ജിപ്‌സം മുതലായവയാണ്‌ പ്രധാനധാതുക്കള്‍. മലഞ്ചരിവുകളില്‍ ഏറിയഭാഗവും വനങ്ങളും പുല്‍ മേടുകളും കൊണ്ടു നിറഞ്ഞിരിക്കുന്നു. കൃഷിയോഗ്യമായ മലഞ്ചരിവുകള്‍ തട്ടുതട്ടായി തിരിച്ച്‌ തേയില, ഇഞ്ചി, ഉരുളക്കിഴങ്ങ്‌ എന്നിവ കൃഷി ചെയ്യുന്നു.
കുളു താഴ്‌വരയില്‍ കൃഷിയോഗ്യമായ സ്ഥലങ്ങള്‍ താരതമ്യേന കുറവാണെങ്കിലും, ഹിമാചല്‍ പ്രദേശില്‍ ഏറ്റവും കൂടുതല്‍ കാര്‍ഷികഭൂമി കുളുവിലാണുള്ളത്‌. താഴ്‌വാരങ്ങള്‍ വളരെ ഫലഭൂയിഷ്‌ഠമായതുകൊണ്ടും ജലസേചനസൗകര്യം മെച്ചപ്പെട്ടതായതുകൊണ്ടും കൃഷി കാര്യമായ തോതില്‍ നടക്കുമെന്നതിനാല്‍ മറ്റു പ്രദേശങ്ങളെ അപേക്ഷിച്ച്‌ കുളു താഴ്‌വരയില്‍ ജനവാസം കൂടുതലാണ്‌. 1,050 മീറ്ററിനു മുകളിലുള്ള മലയോരപ്രദേശങ്ങളിലെ പ്രധാനകൃഷി ആപ്പിളാണ്‌. കുളു ആപ്പിള്‍ പ്രസിദ്ധമാണ്‌. ആപ്പിളിനും മറ്റു പഴവര്‍ഗങ്ങള്‍ക്കും പേരുകേട്ട നിരവധി തോട്ടങ്ങള്‍ ഇവിടെയുണ്ട്‌. കുളുവിനു സമീപമുള്ള ബാന്ത്‌റോള്‍ പഴത്തോട്ടങ്ങളും മണലിയിലുള്ള സണ്‍ഷൈന്‍ പഴത്തോട്ടങ്ങളും വളരെ പ്രസിദ്ധിയാര്‍ജിച്ചവയാണ്‌. ഇതുകൂടാതെ മറ്റു പഴവര്‍ഗത്തോട്ടങ്ങളും ഇവിടെയുണ്ട്‌. ഗോതമ്പ്‌, ചോളം, നെല്ല്‌, ബാര്‍ലി, പയറുവര്‍ഗങ്ങള്‍, മറ്റു ചെറുധാന്യവര്‍ഗങ്ങള്‍, ഗ്രാമ്പു, ഇഞ്ചി മുതലായവയാണ്‌ മറ്റു കാര്‍ഷികോത്‌പന്നങ്ങള്‍. നിരവധി പച്ചക്കറിത്തോട്ടങ്ങളും അവിടവിടെയായി കാണാം.
കൃഷിയോടൊപ്പം കന്നുകാലിവളര്‍ത്തലും ഉണ്ടെങ്കിലും ജനങ്ങളില്‍ ഭൂരിഭാഗവും കൃഷിയെ ആശ്രയിച്ചു കഴിയുന്നവരാണ്‌. ഈറവെട്ട്‌, തേനെടുക്കല്‍ , വേട്ടയാടല്‍ , പൂന്തോട്ടനിര്‍മാണം, ഖനനം മുതലായവയാണ്‌ സാധാരണജനങ്ങളുടെ പ്രധാനപ്പെട്ട തൊഴില്‍ . മത്സ്യബന്ധനവും ആടുമാടുവളര്‍ത്തലും ആണ്‌ മറ്റ്‌ ഉപജീവനമാര്‍ഗങ്ങള്‍. ഗാഡീസ്‌ ആണ്‌ ഇവിടത്തെ പ്രധാനപ്പെട്ട ആട്ടിടയവര്‍ഗം.
വളരെ ലളിതജീവിതം നയിക്കുന്ന ഇവിടത്തെ ജനങ്ങള്‍ വിശ്രമവേളകളില്‍ കമ്പിളി നെയ്യുന്നു. തക്ലിയില്‍ കമ്പിളിനൂല്‍ ഉണ്ടാക്കുകയാണ്‌ എല്ലാപ്രായത്തിലുംപെട്ട ജനങ്ങളുടെ പ്രധാനതൊഴില്‍ . കുളുത്തൊപ്പികളും ഷാളുകളും വിദേശങ്ങളില്‍ പോലും പ്രസിദ്ധിയാര്‍ജിച്ചിട്ടുണ്ട്‌. ഇവിടെ അധികവും ചെറുകിടവ്യവസായങ്ങളാണ്‌. വ്യവസായങ്ങള്‍ക്കുള്ള വൈദ്യുതി കുളു ജലവൈദ്യുതപദ്ധതിയില്‍ നിന്ന് ലഭിക്കുന്നു. "ഖാദി ആന്‍ഡ്‌ വില്ലേജ്‌ ഇന്‍ഡസ്റ്റ്രീസും' മറ്റു ചെറുകിടവ്യവസായസ്ഥാപനങ്ങളും ചെറിയതോതില്‍ ഉത്‌പാദനം നടത്തുന്നു.
മണാലിയും കുളുവുമാണ്‌ പ്രധാന സുഖവാസകേന്ദ്രങ്ങള്‍. പച്ചപുതച്ച കുന്നുകളും സൂചിയിലക്കാടുകളും പറ്റംപറ്റമായി സഞ്ചരിക്കുന്ന ചെമ്മരിയാടുകളും അവയെ മേയ്‌ക്കുന്ന, വിവിധ വര്‍ഗങ്ങളിലുള്ള ആട്ടിടയന്മാരുമെല്ലാംകൂടി ഈ താഴ്‌വരയെ ഒരു വിനോദസഞ്ചാരകേന്ദ്രമാക്കിത്തീര്‍ക്കുന്നു. സിംലയില്‍ നിന്ന് ലുഹ്‌റി വഴിക്കും നര്‍ക്കണ്ടവഴിക്കും കുളുവില്‍ എത്താന്‍കഴിയും. പത്താന്‍കോട്ടില്‍ നിന്ന് 282 കി.മീ. അകലെയാണ്‌ കുളു. പുരാണപ്രസിദ്ധമായ ഒരു തടാകവും മണലിയിലുണ്ട്‌. മണലിയില്‍ വസിഷ്‌ഠ എന്ന ഗ്രാമത്തില്‍ ചൂടുള്ള ധാരാളം ഗന്ധകനീരുറവകളുണ്ട്‌. വിനോദസഞ്ചാരികള്‍ക്ക്‌ കുളിക്കാനുള്ള സൗകര്യങ്ങള്‍ ഇവിടെ ചെയ്‌തിട്ടുണ്ട്‌. കുത്രയിനും നഗ്ഗറും കുളു താഴ്‌വരയിലെ അറിയപ്പെടുന്ന ചെറുഗ്രാമങ്ങളാണ്‌. നഗ്ഗര്‍ കുളുവിന്റെ പഴയ തലസ്ഥാനമാണ്‌. കുത്രയിനില്‍ മത്സ്യബന്ധനവും തേനീച്ചവളര്‍ത്തലും പച്ചക്കറി കൃഷിയുമാണ്‌ പ്രധാനതൊഴില്‍ . കുത്രയിനില്‍ നിന്ന് 4 കി.മീ. അകലെയാണ്‌ നഗ്ഗര്‍. ഇവിടെ ചിത്രപ്പണികളോടുകൂടി തടിയില്‍ പണിത മനോഹരമായ ഒരു കൊട്ടാരമുണ്ട്‌.
ഹൈക്കിങ്‌ ആണ്‌ മുഖ്യമായ കായികവിനോദം. ദസ്രയാണ്‌ ജനങ്ങളുടെ പ്രധാനപ്പെട്ട ഉത്സവം. ഇവിടത്തെ ദസ്ര ആഘോഷങ്ങള്‍ പ്രസിദ്ധമാണ്‌. ദസ്രയോടൊപ്പം ധാരാളം വ്യാപാരമേളകളും ഉണ്ടാകാറുണ്ട്‌. ഓരോ ഗ്രാമത്തിനും അവയുടേതായ ദൈവങ്ങള്‍ ഉണ്ട്‌. ദസ്രക്കാലത്ത്‌ ഈ ദൈവങ്ങളെ എഴുന്നള്ളിക്കുക എന്നതാണ്‌ പ്രധാനചടങ്ങ്‌. മണലിയില്‍ ഭീമസേനപത്‌നിയായ ഹിഡുംബിയുടെ പേരിലുള്ള ഒരു ക്ഷേത്രമുണ്ട്‌. കുളു താഴ്‌വരയിലെ മറ്റു രണ്ടു പ്രസിദ്ധ ക്ഷേത്രങ്ങളാണ്‌ ബജൗറയും ഭുംഗ്രിയും. കലാശില്‌പപരമായി ഇവ തികച്ചും വ്യത്യസ്‌തങ്ങളാണ്‌.
കുളു താഴ്‌വരയില്‍ , ബിയാസ്‌ നദിക്കരയിലാണ്‌ കുളു, മാണ്ഡി എന്നീ പട്ടണങ്ങള്‍. ജില്ലാ തലസ്ഥാനമായ കുളുവിനെ നിരവധി പട്ടണങ്ങളുമായി റോഡുമാര്‍ഗം ബന്ധിപ്പിച്ചിരിക്കുന്നു. ബുന്തറില്‍ ഒരു ചെറിയ വിമാനത്താവളമുണ്ട്‌. വേനല്‍ ക്കാലങ്ങളില്‍ വിമാനഗതാഗതം ഉണ്ടായിരിക്കും. സമുദ്രനിരപ്പിന്‌ 755 മീ. മുകളിലായി സ്ഥിതിചെയ്യുന്ന മറ്റൊരു പട്ടണമാണ്‌ മാണ്ഡി. ഇതും കുളുവിനെപ്പോലെ ഒരു വാണിജ്യകേന്ദ്രമാണ്‌.
(എസ്‌. ഗോപിനാഥന്‍)
